Yardım

- Qaqam sual olar?

- Bəli, olar.

- Bax, bəzi adamlar var xeyriyyə işi keçirib reklam edirlər. Bu nə dərəcədə düzdür?

- Səni narahat edir? Narahat edirsə sən daha gizli yardım edib alternativ göstərmiş olarsan.

- Yox, sadcə elə bil ki, gizli olsa daha yaxşıdır. Misal üçün televizorda göstərirlər şou-biznes camaatını. Mənim tanışlarım onları çağırmışdı, kamera olmadığına görə gəlmədilər.

- Yardım etmək dedikdə nə başa düşürsən?

- Nə bilim, sənin əlində olanı olmayanla paylaşmaq.

- Düzdür, lakin etiraf edək ki, yardım həm fərdi, həm də ictimai ola bilər. Onsuz da bir işin süniliyi, təbiiliyi aşkar görsənir.

- Elədir, bəs fərdi yardım nə deməkdir? Hansı yardım daha yaxşıdır?

- Qürurlu, özünəqapanan insanlara yardım etmək.

- Doğrudan? Bəs yolçuya pul vermək sədəqə hesab edilə bilər?

- Qardaş, bəzi dilənçinin aylıq məvacibi sənin aylıq məvacibindən çoxdur.

- Bəs, o zaman kimə verək?

- Tələbələrə, qazancı az olan ailələrə, yaşlı və əlil olan qürurlu kimsəsiz insanlara ki, dilənmirlər, lakin ehtiyaclıdırlar.

- 1 manat?

- Şərt 1 manatda deyil, varlığını onunla bölüşüb, yanında olmaqdır.

- Qardaş, bəs o şəkil və kamera məsələsi?

- Yenə də kamera?

- Bəs sünilər, riyakarlar? Mənə aydın oldu ki, məsələ onda deyil. Lakin bu özünü göstərənlər?

- Əzizim, indiyə qədər süni şeyin çox yaşadığını görmüsənmi?

- Süni güllər təbii güllərdən çox yaşayır.

- O əşyadır, davranış deyil.

- Aydındır, yəni?

- İctimai məsələləri gündəmə gətirmək diqqəti məsələyə cəlb edir. Lakin dediyim bir qism fərdi məsələləri gizli saxlamaq lazımdır. Qürurlu camaatın abrı getməsin.

- Bəs şikəst və əlil olub yardıma ehtiyaclı olsa?

- O da şəxsə bağlıdır. Həm də məsələsindən asılıdır. Sən bilirsənmi, nə qədər insan ehtiyaclı olaraq susur və bunun nəticəsində tələf olur?

- Hmm, düzdür. Çox həssas məsələdir. Minnətdaram qardaş, bu barədə çox işlər görmək olar.

- Əlbəttə olar. Lakin unutmayaq ki, yardım pulla ölçülmür.

- Necə yəni?

- Bəzən bildiyini paylaşmaq da yardımdır, sınıq qəlbi qorumaq, zəifi mühafizə etmək də...

- Çox sağ ol, təşəkkür edirəm.

- Buyur.

Fərid Abdullah.