Vaxtım çatmır (İbrətamiz)

Bir dəfə şagird müəllimindən soruşur: "Müəllim, zəhmət olmasa, deyin görüm mən nə edim? İnanın ki, mənim heç vaxt heç nəyə zamanım çatmır. Bir neçə iş arasında parçalanıram, amma axırda heç birini də yaxşıca yerinə yetirə bilmirəm". 

– Bu tez-tez olur? – deyə müəllim soruşdu. 

– Bəli, – şagird cavab verdi, – mənə elə gəlir ki, sinif yoldaşlarım arasında bu, daha çox mənim başıma gəlir. 

– Bəs ayaq yoluna necə, belə hallarda oraya getməyi çatdırırsan? 

Şagird təəccübləndi: 

– Əlbəttə, müəllim. Bu necə sualdır?! Niyə soruşdunuz ki? 

– Getməsən nə olar? 

Şagird utanaraq dedi: 

– Mmm, necə yəni getməsən... Axı bu bir ehtiyacdır, zərurətdir! 

– Ay sağ ol! – müəllim dedi. – Deməli, istək olduqda, özü də bu istək həqiqətən böyük olduqda, sən onun üçün hər bir halda vaxt tapırsan...