Fevral ayının
əlamətdar günlərindən biri də ömrünün gənc çağlarında özünü vətən uğrunda fəda
edərək şəhid olmuş gənc Mübariz İbrahimovun doğum günüdür. Bu günün özünəməxsus
özəlliyi, doğmalığı var. Acınacaqlı olsa da deməliyəm ki, Mübariz illərdir
yuxuya getmiş gözlərimizi açdı, uçub-dağılmış arzularımızı inşa etdi, sönmüş
ümid şamımızı yenidən yandırdı. O hamının ömrünü sərf etdiyi istiqamətə
getmədi, könüllü surətdə fitrəti üzrə hərəkət etdi.
Mübariz nəinki
düşmənə qarşı olan mübarizədə, hətta bu həyat mübarizəsindən də üzüağ çıxdı.
Təsəvvür edin, əsgər ölümləri, hərbi xidmət sıralarında özbaşınalıq,
“dedovşina” adət-ənənələri sürən bir zamanda həyata yeni nəfəs açdı. Elə
bilirsiz ki, son zamanlarda “Əsgər ölümü” sürətlə yayılmaqdadır?! Xeyr, elə o
zamanlar da köhnə hamam, köhnə tas sindromu davam edirdi, bununla bərabər
xalqın mübarizə ruhiyyəsi də şaxtalı qış gecələrində donub-qalmış su
misalındaydı. Bu suyu yenidən canlandırmaq üçün, qarlı havanın hökm sürməsinə
baxmayaraq, külünglə yarmaq lazım idi. Mübariz bunu bacardı.
Bu həyatda
kamil bir hədəfə çatmaq üçün bir yol yoxdur. Yollar insanların sayı qədərdir.
“Həyat mübarizədir və bu mübarizədə güclülər yaşayır” – prinsipi əsasında
zəiflər məhv edilir və dünyada diktaturalıq hökm sürür. Xeyr, bu fikr tamamilə
başqa cür təsvir olunub. Bu həyatda güclülərin yaşadığı düzdür, lakin zəifi
əzərək güclənən deyil, güclənmiş zülm və əngəl yaratmış problemlərlə mübarizə
aparan şəxs güclü hesab edilir. Güclü kəs zəifi əzib-tapdalayn deyil, zəifin
əlindən tutub qaldıran kəsdir. Güclü kəs qorxunun üzərinə gedən kəsdir. Güclü
kəs özünü deyil, bir milləti, xalqı düşünən kəsdir. Güclü kəs müqəddəs niyyət
uğrunda ona ən dəyərli olan canını belə qurban verməyə hazır olan kəsdir.
Qəhrəmanlar
yalnız döyüş sahələrində olmur. Qəhrəmanlar həyatın bütün kriteriyalarında var.
Səhər işə gedib, axşam evə qayıdaraq, ev işləri görən, ərinə, övladlarına qulluq
edən bir qadın da qəhrəman hesab edilir. İnsan həyatının bütün sahələrində
qəhrəmanlıq zirvəsinə çatmalıdır. Bu da şərəfli ömürün bəhrəsidir. Ağacı başsız
buraxaraq, ondan səmərə almaq istəyənlər axmaq insanlardır. Zəhmət və təşəbbüs
göstərərək, hər bir zəhmətə-möhnətə qatlaşaraq ömür ağacını bar vermə
mərhələsinə çatdıranlar isə qəhrəmandılar və bu günkü gündə bu qəhrəmanlara
ehtiyacımız var, ən azından gözümüzün önündə olmalarına.
Mübariz həmin
qəhrəmanlardan idi. Çünki hamı bacara bildiyini etmədi, yalnız az insanların
bacara biləcəyini etdi, qəhrəmanlıq göstərdi. Ona görə də qəlblərimizdə
özünəməxsus yerini tutdu və Tanrı onu qəlbimizdə yaşatdı. O, bizim üçün doğma
oldu, qəlblərimizə təsəlli, düşmənə gözdağı, xalqa isə ümid verdi.
Bax, buna görə
də Mübarizin doğumu da, şəhid olması da bizim üçün əzizdir. Çünki o, təkcə ana
və atasının deyil, həm də bütün Azərbaycan xalqının övladıdır.
Fərid Abdullah
Комментариев нет:
Отправить комментарий